اكلات مصريه فظيعه

الارز المعمر
--------
فهو ببساطة رز باللبن و القشطة بيتحط فى الفرن
تجيبى رز الكمية اللى تحبيها وضعفها لبن يعنى كوب الرز عليه كوبين لبن وتحطيهم مع بعض يعنى تنقعى الرز فى اللبن وبعدين تحطيه على النار حاجة بسيطة وبعدين تنقليه ضرورى لطاجن فخار ووممكن تزودى لبن تانى لو كان الرز مش متغطى لبن ومفيش فيه ملح خالص لانه بيبقى مسكر شوية لكن ممكن مستكة وحبهان لو تحبى وتحطى عليه ضرورى معلقة قشطة ومعلقة سمنة بلدى وتحطيهم فى الفرن لحد ما يستوى الرز ووشه يحمر
ويمكن الفراخ بتتعمل جنب الرز لان ملهاش علاقة رسمية بيه
---------------
فول بطماطم
المقادير
كمية فول مدمس تكفي لأربع أفراد
1 طماطم كبيرة
1 فلفل رومي كبيرة
2 ملعقة طعام طحينة
ربع ملعقة صغيرة شطة
ملعقة صغيرة ملح
ملعقة صغيرة خل
1 سن ثوم
زيت حسب الرغبة
قليل من الماء
الطريقة
1. يفرغ الفول في إناء الطهو ثم نقوم بتقطيع الطماطم والفلفل إلى قطع صغيرة عليه.
2. نضيف القليل من الماء والزيت حسب الرغبة.
3. نقطع سن الثوم إلى نصفين ونضفيهم ونضع الخل والملح والشطة وملعقة الطحينة ونقوم بتقليب جميع المحتويات على نار هادئة من 5 إلى 10 دقائق.
وساعات فى ناس بتضيفله بسطرمة
-------------------

الحلبسة او حمص الشام
تجيبى اولا الحمص وتنقيه وتغسليه وبعدين تنقعيه فى الماء انا بسيبه من بالليل للصبح وبعدين ترمى ميه النقع وتغسليه
وبعدين تحطيه ممكن فى دماسة الفول وتحطيله ميه وكمون وملح وقطعة بصل ومون فصين توم يعنى مثلا لوربع كيلو حمص حطي بصلة صغيرة واربع فصوص توم مش كتير يعنى وممكن تقطعيهم صغير جدا او تبشريهم لو مش بتحبى يظهر فى الاكل وطماطماية معصورة ولمون وممكن خل بس انا بفضل اللمون بس واتركيه على النار لحد ما يستوى وممكن اللى يحب يزود شطة او لمون
-----------

( المفتقة المصرية الأصيلة ) المفتقة ( الحلاوة السودة )
دى مقادير متناسقه بمعنى ممكن نعمل نصها او ضعفها حسب الرغبه
7 كيلو عسل اسود كثيف من السرجه (وليس البقال)
كيلو ونص زيت ذره و معلقة صغيره ملح ليمون
25 جرام كتيره و 50 جرام حبه خضرا وربع كيلو كركم
200 جرام تحويجة مفتقة و ربع كيلو حبة بركه مطحونه ( عجينه)
البنود الخمسه الاخيره من عند العطار عادى
نص كيلو سمسم وربع كيلو جوز هند
نص كيلو مشكل عين جمل وبندق ولوز مجروشين خشن
نحط حبة البركة والحبة الخضرا فى 2 كيلو عسل ونقلبهم قبل الشغل بيوم
ونحط الكتيرة فى نص كوباية ميه كبيره
تانى يوم ....
هانجيب حله كبيره بحيث لما نحط العسل لا يزيد عن التلت
الحله دى هانحطها على النار فاضيه ونحط الزيت كله
لما يغلى نحط السمسم والمكسرات والكركم
واول ما يصفروا نشيل نصهم بره ونحط عالباقى العسل كله
ونحط العسل اللى بايت فيه الحبه الخضرا وحبة البركة
ثم نضيف الكتيره المنقوعه بميتها
ونسيب الكل عالنار حتى الغليان ويبدأ العسل فى الفوران ويزيد
علشان كده قلنا حله كبيره علشان تتقبل الزياده فى الحجم
و يستمر الغليان مع التقليب المستمر وبعد نص ساعه نضيف ملح الليمون
ونستمر فى الغليان والتقليب
هانلاقى الخليط بيتخن شويه شويه ولونه بيسود مع تركيز العسل
لغاية مانقطى الخليط تسقط من المعلقه بالراحه وليس سريع
ونلاقى فجوات الغليان بتتجمع فى النص ( اسمها مرحلة عين الكتكوت)
ودى علامة السوى
ونطفى النار ونسيبها لتانى يوم علشان تبرد
ونكون مجهزين البرطمانات الجافة تماما ونعبيها ناقص سم
ونضيف على وش كل برطمان معلقة كبيره من خلطة المكسرات اللى حجزناها من الاول
---------------

البطاطا:
تغسل حبات البطاطا وتنظف من الطين وبعدين نجيب حلة ونحط فيها ورق ياريت بلاش ورق جرايد ويستحسن اى ورق تانى كرتون او كذا طبقة من الورق الابيض العادى ونرش ميه قليل على الورق بيحس يكون مبلول وبعدين نحط البطاطا وبعدين نحط برضه ورق تانى بحيث نغطى البطاطا تماما بالورق وبرضه نرش عليه ميه قليله ونحطها على نار هادية وكل شوية نفتح لو لقينا الميه نشفت نرش مية قليل تانى... لاتغرقيها بالماء وفى نفس الوقت لا تتركيها حتى تنشف ويحترق الورق تابعى العملية حتى تنضج البطاطا ولا تتعجلى نضجها اتركيها على نار هادئة مع اضافة الماء بالتدريج
البطاطا المشوية: نغسل البطاطا وبعدين نحطها فى الفرن بسيطة جدا " بس المسلوقة بالورق احلى كتير
وبعد ان تنضج البطاطا باى من الطريقتين نفتحها ونرش عليها سكر
او فى بعض الناس بتحبها حادقة وبترش عليها ملح