ميزو وسمسمه

موضوع: ميزو وسمسمه الأربعاء سبتمبر 09, 2009 8:18 am

ميزو و سِمسِمه

حكايه كل شباب انهارده .. حنشوفها في شخص ميزو الطالب الجامعي المتخرج من 4 سنين من صيدله السنبلاوين .. و حبيبته سمسمه, بكالوريوس هندسه قسم ( كهربه أفراح ) !

ملحوظه قلبوظه::: ميزو ده شخصيه خياليه محديش يفهم غلط بس
Very Happy

:D

ميزو تتجوزيني ؟

سمسمه ـ أفندم ؟

ميزو ـ بقولك تتجوزيني ؟

سمسمه ـ !!!!!

ميزو ـ تتجوزيني ؟

سمسمه ـ لا !

ميزو ـ ليه ؟

سمسمه ـ بصراحة كدة شكلك مش عاجبني ..

ميزو ـ إزاي يعني ؟

سمسمه ـ يعني .. أصل أنا ليا مواصفات معينة لفارس أحلامي .

ميزو ـ مواصفات معينة ؟ .. هو انتي هتتجوزي عربية ؟

سمسمه ـ لا ! .. بصراحة كدة .. إنت مش فارس أحلامي اللي باتمناه !

*****

ميزو ـ تتجوزيني ؟

سمسمه ـ إيه ده ؟ شكلك اتغير !

ميزو ـ إيه رأيك ؟

سمسمه ـ واو .. شعرك بقة ناعم ! .. دي باروكة ؟

ميزو ـ أيوة

سمسمه ـ ودي عدسات خضراء ؟

ميزو ـ أيوة

سمسمه ـ واو ! .. بس بجد .. بقيت وسيم .. واو ! ده انت بقيت شبه نيكولاس كيج !

ميزو ـ مين عباس كيج ده ؟

سمسمه ـ عباس ؟!! ياي .. إيه عباس دي ؟ اسمه نيكولاس ..

ميزو ـ مين نيكولاس ده ؟

سمسمه ـ بقة مالكشي في السيما وجاي تكلمني ؟ .. ياي !

*****

ميزو ـ تتجوزيني ؟

سمسمه ـ انت لسة ليك عين تكلمني ؟

ميزو ـ أيوة .. أنا عرفت مين بنكرياس كيج ده

سمسمه ـ أولاً : اسمه نيكولاس كيج ..

ميزو ـ أيوة أيوة .. كنت هاقول اسمه صح .. بس اختصرته .. ده ممثل

سمسمه ـ ممثل إيه ؟

ميزو ـ ممثل أمريكاوي

سمسمه ـ أمريكاوي ؟! .. إخّييي ! .. اسمه أميريكان يا بابا .. ما تبقاش

دونكي

ميزو ـ دونكي دي تبقى شتيمة ؟

سمسمه ـ أوف كورس

*****

ميزو ـ تتجوزيني ؟

سمسمه ـ عندك عربية موديل كام ؟

ميزو ـ موديل دي تبقى شتيمة ؟

*****

ميزو ـ تتجوزيني ؟

سمسمه ـ قوللي الأول .. حاطط أنهي نغمة في الموبايل بتاعك ؟

ميزو ـ نغمة دي تبقى شتيمة ؟

*****

ميزو ـ تتجوزيني ؟

سمسمه ـ ما قلتليش .. إنت بتشتغل إيه ؟

ميزو ـ أنا -بلا فخر- عاطل

سمسمه ـ عاطل ؟ .. ياي ! ..

ميزو ـ مش أحسن من اللي ما بيشتغلش ؟

سمسمه ـ لا

ميزو ـ يعني مش هتتجوزيني ؟

سمسمه ـ لا يا ميزو

ميزو ـ كدة أنا أزعل

سمسمه ـ ما تزعلش يا بابا .. خليك فريش

ميزو ـ ماشي .. ماشي .. بس قوليلي ..

سمسمه ـ إيه ؟

ميزو ـ فريش دي تبقى شتيمة ؟

*****

ميزو ـ تتجوزيني ؟

سمسمه ـ لقيت شغل ؟

ميزو ـ أيوة طبعًا .. سنتين وأنا بادور .. أخيرًا لقيت ..

سمسمه ـ وإيه هو ؟

ميزو ـ سواق تاكسي .

سمسمه ـ ياي ! .. مش مكسوف وانت بتقولها ؟

ميزو ـ فيها إيه ؟ العمل شرف .. وكلها كام سنة وأجمع مبلغ كويس ..

سمسمه ـ شرف ؟ جتك القرف !

*****

ميزو ـ تتجوزيني ؟

سمسمه ـ جمعت مبلغ كويس ؟

ميزو ـ طبعًا .. مبلغ كبير جدًا ..

سمسمه ـ قد إيه يعني ؟

ميزو ـ ألف جنيه

سمسمه ـ نعم ؟!!! .. ألف جنيه دول تروح تسرح بيهم ببطاطا ..

ميزو ـ يعني موافقة ؟

سمسمه ـ روح اتنيل .

*****

ميزو ـ تتجوزيني ؟

سمسمه ـ عندك شقة ؟

ميزو ـ طبعًا .. أودة على السطوح ..

سمسمه ـ نعم ؟!! ..

ميزو ـ إيه المشكلة ؟! .. أحسن ما ننام في الشارع !

سمسمه ـ في الشارع ؟! .. إيه الألفاظ السوقية دي ؟! ياي ! .. لازم يا بابا تجيب

شقة .

ميزو ـ طيب .. كلها كام سنة وأجيبلك أحسن شقة في الدنيا .

سمسمه ـ وهتجيبها في جاردن سيتي ولا في الزمالك ؟

ميزو ـ لا .. في الأهلي .. هيهع هيهع هيهع !

*****

( بعد سنوات) :

ميزو ـ تتجوزيني ؟

سمسمه ـ جبت الشقة ؟

ميزو ـ أيوة .. الحكومة بتبني شقق للشباب وأنا خدت شقة .. صحيح إنها اتأخرت

لسبع سنوات .. لكن المهم إنها جات ..

سمسمه ـ فانتاستيك

ميزو ـ بس الشقة ناقصة حاجة .

سمسمه ـ إيه هي ؟

ميزو ـ مفيهاش حمام !

سمسمه ـ امشي من قدامي ! .. مش طايقاك !

*****

ميزو ـ تتجوزيني ؟

سمسمه ـ إنت تاني ؟

ميزو ـ جبتلك حمّام إنما إيه

سمسمه ـ خليه ينفعك

ميزو ـ ليه بس ؟ .. ده ينفع لينا احنا الاتنين

سمسمه ـ وأنا مالي ؟

ميزو ـ مش عاجبك .. مش مشكلة .. أكتبه باسمك

*****

(بعد سنين) ..

ميزو ـ هتتجوزيني ولا أولع فيكي ؟

سمسمه ـ ومالك محروق كدة ؟

ميزو ـ حكايتنا طولت قوي .. طولت أكتر من اللازم

سمسمه ـ أوكي .. بس ممكن أعرف حاجة ؟

ميزو ـ إيه ؟

سمسمه ـ إنت ليه متمسك بيا أوي كدة يا مزمز ؟

ميزو ـ أصل .. أصل ..

سمسمه ـ أصل إيه ؟

ميزو ـ أصل أنا بحُبك (بضم الحاء) !

سمسمه ـ بحُبك ؟!! .. إيه بحُبك دي ؟! .. إسمها بحِبك (بكسر الحاء) ! ..

وبعدين خليك روش وقول : I love you

ميزو ـ ماشي .. بس قوليلي ..

سمسمه ـ نعم ؟

ميزو ـ روش دي تبقى شتيمة ؟

*****

ميزو ـ تتجوزيني ؟

سمسمه ـ بصراحة .. في حاجة كنت عاوزة أقولهالك من زمااااااان يا ميزو .

ميزو ـ إيه ؟

سمسمه ـ أنا بصراحة .. مش شايفة إن في حد في العالم يستاهلني

ميزو ـ يا سلام ! .. ليه ؟

سمسمه ـ عشان أنا جميلة .. خفيفة الدم .. رشيقة .. رقيقة ..

ميزو ـ رقيقة ؟! .. ده انت بدأتي تقشفي

سمسمه ـ فشر !

ميزو ـ فوقي لنفسك .. العمر بيجري ..

سمسمه ـ أنا مصرة على رأيي

ميزو ـ يعني إيه ؟

سمسمه ـ يعني اقطع معايا

ميزو ـ بعد كل السنين دي ؟! .. بعد كل الحب ده ؟!!

سمسمه ـ بلاش تراجيديا من فضلك

ميزو ـ ماشي .. بس قبل ما أمشي عاوز أسألك سؤال واحد بس ..

سمسمه ـ إيه هو ؟

ميزو ـ تراجيديا دي تبقى شتيمة ؟

*****

( بعد سنوات ) ..

ميزو ـ تتجوشيني ؟

سمسمه ـ إيه ؟

ميزو ـ تتجوشييينييييييي ؟

سمسمه ـ إنت مين ؟

ميزو ـ أنا حبيبك يا هبلة .. البشي النضارة عشان تشوفيني

سمسمه ـ طيب شاعدني عشان ألاقي النضارة

ميزو ـ آهي على الترابيزة قدامك

سمسمه ـ فين ؟!!

ميزو ـ لا دي نظارتي أنا

سمسمه ـ أيوة لقيتها ..

ميزو ـ البشيها بقة

سمسمه ـ ططييبب

ميزو ـ عينيكي فوق شوية يا سماسم .. ده بقك ..

سمسمه ـ طيب لبشهالي إنت

ميزو ـ عقبال ما البشك الدبلة

سمسمه ـ ما تكشفنيش يا ميشو بقي .. كنت بتقول إيه بقى ؟

ميزو ـ كنت بقول تتجوشششيييينيييييي ؟

سمسمه ـ أكوشك ؟ .. إزاي ؟

ميزو ـ يا ولية مش تكوشيني .. تـ .. تـ .. جـ .. و.. شـ .. يـ .. نـ .. ي ؟

سمسمه دي شتيمة ؟

ميزو لاااااء .. بقولك تتجوشيني ؟

سمسمه ـ آه !! .. أجوشك

ميزو ـ بالضااااابط .. هاه ؟

سمسمه ـ شيبني أفكر

ميزو ـ أشيبك تفكري ؟! .. ده انت هتموتي خلاش !

سمسمه ـ لا .. شيبني أفكر بش

ميزو ـ ربنا يوفقك

سمسمه ـ إيه ؟

ميزو ـ ربنا يوفقك

سمسمه ـ بتقول إيه ؟

ميزو ـ ربنا ياخدك

*****

(على فراش الموت) :

ميزو ـ تـ … كوح .. كوح .. تتـ .. كوح كاح كيح .. تتكو .. كوح .. كوح ..

تتكوشـ .. كوح كوح .. يني ؟

سمسمه ـ مش شامعة

ميزو ـ بـ .. قوللـ .. كوح .. كوح .. بقولك .. تـ .. تـ .. كوح .. كوح .. تتجوشيـ .. ؟ كوح .. كوح …….

سمسمه ـ أجوش مين ؟!!!

ميزو ـ هـ .. و.. ه .. كووح كوح كاح .. هوه إنتي .. كوح كوح .. معرفتيـ .. ش .. كوح كوح كيح .. ميـ .. كوح .. مين ؟!!

سمسمه ـ إيه ؟ ..

ميزو ـ لا .. كوح .. أبدًا .. كوح .. كنت … كح كح .. بأكح

سمسمه ـ كنت بتكح ؟!!!! .. شلامتك .. ما قلتليش ليه ؟

ميزو ـ هو .. كوح .. إنتي .. لشة .. عارفـ .. ـة .. كوح كوح

سمسمه ـ بتقول إيه ؟

ميزو ـ يا .. ولية .. كوح كوح .. ردي .. كوح كوح .. عليا .. تـ .. تـ .. جو.. شيـ .. كوح كوح كوح كوح .. نـي ؟

سمسمه ـ أجوشك ؟!! .. طب بش خد الدوا الأول

ميزو ـ يا وليـ .. ـة .. كوح .. كوح .. أنا .. كوح .. كوح .. هتتجوشيـ .. كوح

كوح كوح .. ـني ؟

سمسمه ـ أيوة يا حاج .. موافقة .. موافقة إنك تتكوشني ..

ميزو ـ أخيـ….كوح كوح ..راااااً !! .. كوح كوح .. كدة أموت .. كوح ..

كوح .. وأنا .. كوح .. مطمئن ومرتاح .. الودااا .. كوح ..ع ع ع ع

سمسمه ـ يا حاج .. يا حاج ..

لااااااااااااااااااااااااا

ههههههههههههههههههههههههههه
جميلة كوح كوح ..... ع ع ع ع كوح جدا يا قمر كوح كوح .......... ع ع ع يشلمو ايدك

يسلموووو ايديكى ياقمر على القصه الرائعه ده حتى مادووو اتعدى ولقط حرف الـــ ((ش)) مشكوره ياقمر دمتى بود

موضوع: رد: ميزو وسمسمه السبت سبتمبر 12, 2009 6:25 am

ههههه العفو يا جميل ومعلش بقى يا مادو تعيش ةوتاخد غيرها مش فى باقى الحروف بردو ولا ايه lol!